Protezi

I cjistiei a son fra i bens monumentâi chei che plui a riscjin di jessi tocjâts e trasformâts in mût incoerent. Lis cundizions precariis di conservazion, la pussibilitât no simpri comude di un ûs cun finalitâts modernis, il delicât rapuart cul paisaç naturâl o fat sù dulintor, i riferiments a contescj tant diferents di chei di vuê, a sburtin o a favorissin intervents su lis struturis architetonichis o sul ambient dongje che cualchi volte a àn efiets disastrôs.

Duncje e covente pardabon une scrupulose opare di tutele e protezion.

I imprescj fondamentâi par garantî la protezion di chei monuments a son: 

• La azion dai parons par garantî intervents di restaur e di ûs che a sedin un grum rispietosis des carateristichis storichis e architetonichis dal monument.
• Il vincul monumentâl previodût de legjislazion statâl in vore in teme di bens culturâi, e massime dal “Codiç dai bens culturâi e dal Paisaç” mandât fûr cun Decret Legjislatîf dal 22 di Zenâr 2004, n. 41. Il Codiç al previôt tant che forme di tutele la “Declarazion dal interès culturâl dal ben”, che e je pronunciade dal Soreintendent competent, tant che orghin periferic dal Ministeri pes Ativitâts e pai Bens Culturâi, e notificât a cui che al è proprietari, possessôr o che al ten il monument a cualsisedi titul, daûr dai articui 13, 14, 15. I Bens notificâts no puedin sei dissipâts, no si ur pues fâ dam o doprâju in maniere no compatibile cul lôr caratar storic o artistic. Ogni intervent di demolizion, trasformazion o trasferiment di une altre bande al à di jessi autorizât de Soreintendence.
• Il vincul indiret, previodût de legjislazion statâl in vore e che al è definît in gracie di oportunis prescrizions su lis distancis, su lis misuris e su chei altris intervents che a puedin vê a ce fâ cul ambient naturâl o fat sù dulintor di un cjistiel. La materie e je regolade dai articui 45, 46, 47 dal “Codiç dai bens culturâi e dal Paisaç”
• Il vincul urbanistic, previodût de legjislazion regjonâl in teme di planificazion teritoriâl e dai struments urbanistics in vore intal comun dulà che al è il monument. Il proprietari al à di controlâ cuâl che al è il regjim urbanistic e edilizi previodût pal so monument dal Plan regoladôr, dal Plan detaiât se al è, e di altris imprescj di planificazion teritoriâl, e fâ riferiment cun grant scrupul aes normis e aes prescrizions che a son dentri.
• La azion dai organisims di protezion, che tal câs a puedin segnalâ ai orghins competents e ae opinion publiche che lis carateristichis dal monument e dal ambient dulintor a son stadis prejudicadis.

I struments di tutele e di protezion si ju cjate tal librut dât fûr dal Consorzi “La legislazione statale e regionale sui beni culturali” de Golaine “Documentazione”.