Restaurâ

I cjistiei a son struturis antighis, fatis sù in timps un grum lontans e insioradis di zontis che si son disvilupadis tai secui daûr di un progjet articolât di incressite, e caraterizât di une schirie di intervents architetonics e decoratîfs che a son lâts indenant intai secui e che a fasin di ogni cjistiel un complès edilizi unic e di grande varietât e sugjestion. Une vore dispès a àn patît procès di degrât o intervents di trasformazion che a àn fate plui felvare la capacitât di rivoc e di testemoneance di moments impuartants par dulà che e je passade e si è formade la nestre civiltât.

A domandin spes intervents di restaur, che a àn di sei studiâts, progjetâts e metûts in vore cun cure.

Il restaur al è simpri un moment un grum delicât. Prin di dut par vie che al è un moment traumatic par un monument. Si trate di tornâlu a rindi eficient, comedant i vuascj che il bandon o cualchi event traumatic a àn causionât al edifici; o pûr si àn di gjavâ vie i efiets di intervents dal passât che lu àn ruvinât o fiscât. Dut câs, si à di intervignî sul edifici par gjavâ vie i dams o lis parts no congruentis, o par palesâ i segns plui vêrs dal monument. Ogni sielte di restaurazion, di consolidament o di rimozion e à di sei fate daûr dai criteris che a varessin di sei no derogabii, tant che: 

• la trasparence: ogni zonte di elements gnûfs necessaris par resons statichis o pal inseriment di elements tecnologjics che a coventin, o la restaurazion di elements ruvinâts o pierdûts ma dal sigûr documentâts, si à di segnalâle cun discrets elements di distinzion tra la part origjinarie e chê introdusude o restaurade;
• la reversibilitât: ogni intervent nol à di vê efiets distrutîfs sul esistent e si à di podêlu gjavâ tal câs che al coventi o che a sedin cambiadis lis esigjencis o lis impostazions culturâls;
• la autenticitât: se si à di intervignî su struturis preesistentis, si scuen doprâ i stes materiâi e lis stessis tecnologjiis metudis in vore pe realizazion dai elements antîcs, e chest sedi par resons tecnichis, stant che materiâi gnûfs insedâts su materiâi tradizionâi a puedin presentâ compuartaments statics diferenziâts e cualchi volte danôs, sedi pes naturâls resons di rispiet de nature dal monument;
• la conservazion: si àn di conservâ i volums, lis formis, lis struturis, i cromatisims, sghindant ogni alterazion dal monument cun intervents di inovazion che a puartin a une incressite des volumetriis, al inseriment brutâl di materiâi no tradizionâi, al ûs di pituris no coerentis cun chês storichis o dut câs in contrast cul contest.

Pal rispiet di chescj principis il Consorzi al lavore cuntune opare continue di promozion e informazion.

I principis si ju cjate tal librut dât fûr dal Consorzi “Criteri per il restauro dell’architettura fortificata” de Golaine “Documentazione”.