Valorizâ

I cjistiei a àn di sei valorizâts come che a meretin, par une schirie di motivazions che in struc si puedin pandi cussì:

• i cjistiei a son espressions impuartantis di une culture e di une civiltât, e duncje al è ben che, tes formis plui adatis e controladis par garantî la lôr conservazion e il lôr ûs, al sedi pussibil pe comunitât podêju gjoldi in cualchi misure;
• i cjistiei a jentrin intun regjim di tutele, protezion e conservazion che al è stât definît su la fonde dal interès public pe lôr trasmission al futûr;
• i cjistiei a domandin formis continuis di manutenzion, che a puedin sei alimentadis inte plui part dai câs di formis inteligjentis di ûs e di valorizazion, destinadis a produsi i redits che a coventin pe lôr manutenzion.

Lis formis di valorizazion a son plusôrs e cualchidune dal dut disconseade, parcè che e dopre il cjistiel dome tant che contignidôr di ativitâts che no àn nissun riferiment cui significâts storics e cui valôrs architetonics che invezit i cjistiei a cjapin dentri.

Alore, si àn di prudelâ lis iniziativis di valorizazion che no sedin in contrast cui valôrs di testemoneance storiche e culturâl che i cjistiei a pandin, ma che anzit a rigjavin motîfs di cualificazion e di potenziament propit di chês carateristichis.

Si àn di evitâ o discoragjâ ûs e iniziativis che: 

• a scartin la pussibilitât, ancje dome in forme ristrete e prudente, di visite o di fruizion publiche;
• a rivuardin iniziativis e ativitâts dal dut indreçadis al mont moderni e che duncje a sedin disconseadis a pet dai messaçs culturâi includûts intal cjistiel, che in chest câs al sarès doprât dome tant che contignidôr e spazi fisic;
• a domandin pesants intervents di infrastruturazion tecnologjiche o di trasformazions distributivis.

Al contrari, a son di prudelâ lis iniziativis che in cualchi maniere a riclamin lis antighis funzions o che a tornin a proponi ativitâts che dut câs a jerin presintis intal cjistiel tai timps di plui grant sflandôr.

E duncje ativitâts di: 

• cunvignis;
• produzions di vins;
• ristorazion;
• esposizion di reperts museâi il plui pussibil leâts o dongje dai timps dai cjistiei;
• residence;
• ospitalitât.

Su lis ativitâts plui coerentis cu lis carateristichis storichis e culturâls dai cjistiei, il Consorzi al è a disposizion pes oportunis iniziativis di assistence. Si pues ancje consultâ il volumut publicât dal Consorzi “Valorizzazione e riuso dei castelli”, de Golaine “Documentazione”.