Mantignî

Il restaur al è un intervent traumatic pal monument, che si varès di fâ di mancul di frontâ, fale tal câs di events che no si puedin previodi che a produsin dams plui o mancul grâfs pal monument.

Il restaur al à di jessi rimplaçât di une continue e curade opare di manutenzion, che e inderedi l’ingriviâsi di procès di degrât, che dut câs no si puedin evitâ par vie dai agjents meteorics e pai fatôrs ambientâi. La nature e à furnît i materiâi par meti adun i manufats produsûts dal om e, tal câs che e mancji une azion continue di manutenzion de bande sô, la nature stesse e tint a tornâ in possès dai siei elements.

Lis oparis di manutenzion a àn di sei fatis cun continuitât, frecuence e cure, procurant di doprâ materiâi tradizionâi, di metiju in vore cun tecnologjiis tradizionâls. A son dome pocjis ecezions a cheste regule di massime, e dome tai câs che al sedi clâr che lis tecnichis tradizionâls no son buinis, par esempli in riferiment ae protezion des aghis meteorichis (impermeabilizazion des cuviertiduris) o de umiditât (interuzion de capilaritât intes muraduris) o dai fûcs (trataments ignifughis) o dai agjents biologjics (trataments antiparassitaris). Dut câs, a van mantignudis lis stabiliduris antighis, cun oparis di stucadure e fissadure, e ancje cu la integrazion, li che al covente, cun maltis de stesse composizion; lis pituris a son di integrâ o ancje di tornâ a fâ midiant dal ûs di colorants tradizionâi, i solârs di len a àn di sei curâts cun protetîfs naturâi, lis parts di len si à di conservâlis inte massime misure che si pues e a van cambiadis dome in câs ecezionâi cun len stagjonât des stessis plantis. Lis pavimentazions a àn di sei conservadis e mai cambiadis cun materiâi gnûfs. Si à di curâ lis muraduris cun fugaduris adatis di malte dal stes gjenar di chê origjinâl, cence doprâ maltis cimentiziis, che di une bande a imbrutissin e di chê altre a àn proprietâts negativis par chel che al rivuarde la umiditât.

Lis manutenzions si diferenziin in:

• manutenzions ordenariis, cuant che a previodin intervents limitâts e che no domandin la sostituzion di elements struturâi;
• manutenzion straordenarie, cuant che a previodin di tornâ a definî lis sistemazions distributivis e di sostituî elements struturâi.

La distinzion si à di tignîle ben clare, sedi pal diviers impegn tecnic e economic des dôs modalitâts di intervent, sedi parcè che chestis a son sot di diferents regjims di autorizazion. Inte normative urbanistiche e edilizie in vore, tal câs de manutenzion ordenarie e baste la comunicazion al comun de date che si tachin i lavôrs. Tal câs de manutenzion straordenarie, si à di domandâ al comun la autorizazion edilizie. In ducj i doi i câs, se il monument al è vincolât, si à di vê la autorizazion de Soreintendence.