Rievocazione storica

Il paîs di Cordovât si à svilupât tor dal borc medievâl rivât cuasi cence modifichis fin in dì di vuê. A esistin dome doi puescj par ristorâsi: la tratorie Al Tiglio e il bar Centrale che al à ancje cjamaris. Se si à bisugne di albiercs bisugne lâ a Puart o a Sant Vît dal Tiliment, che a son a une desene di chilometris. A Cordovât si rive cu la ferade e cu la coriere.
Il fat storic che si vûl tornâ a fâ vivi nol à nuie a ce fâ cun vueris o violencis, ma al è ligriôs e di bon auguri: lis gnocis fra Ricarde Darcjan e Francesc Ridolfi di Cordovât fatis tal 1571 e che la storiche Alice Sachs e recuperà tal archivi privât dai conts di Darcjan.
In chê volte lis gnocis de nobiltât a rapresentavin une ocasion di grande impuartance: no leavin dome lis fameis ma in chei moments si fermavin vueris e lotis di secui, si comedavin rapuarts malsestâts, si inmaneavin acuardis e interès.
La rievocazion storiche e je une sfilade in costum, dilunc dal borc e pes stradis, dal corteu fat dai rapresentants dai cuatri borcs che a componin Cordovât (Borc, Sacudiel, Suçolins e Vile Bielvedê), ognidun cui siei stendarts. A partecipin ancje oms armâts, cavalîrs, popolans e il Grup sbandieradôrs di Cordovât, cussì che la citadine e jentre intune atmosfere magjiche e emozionante. Il grup, insom dal itinerari, al rive dentri dal Palaç Cecchini, là che, intun grant prât cun plateis, si fâs il Pali.
Tal cjamp i rapresentants dai cuatri rions a partecipin ae gare di tîr cul arc par vuadagnâ la bandiere, une piture fate di un artist cognossût. Ducj i abitants a partecipin al event par tignî pal lôr borc. Ogni an in plui dal Pali si fasin altris spetacui che a mudin par teme a ogni manifestazion.
Cun di plui dute la citadine si anime di bancuts e di mostris tematichis, personis in costum e propuestis di plats medievâi di bande dai ustîrs.