Palazzo Strassoldo Grafenberg-Coronini

La cartografie sietcentescje e testemonee la presince di un zardin che si svilupave parmìs de vile de bande contrarie de jentrade principâl, viert su la plaçute e dât dongje di un implant regolâr dal perimetri cuadrât. Cu la presince dai Coronini a forin daurman inviâts lavôrs discontinuis tal zardin, in gracie dal amôr pal vert che la famee e veve za dimostrât tes altris proprietâts.
L'intervent plui significatîf, sucedût jenfri la fin dal Votcent e lis primis desenis di agns dal Nûfcent, dal sigûr al è merit dal cont Alfredo. Si dedicà al parc (une distese di 5 etars) ideantlu di persone; i viaçs e i contats internazionâi lu vevin di fat puartât a amirâ parcs talians e soredut anglosasson, incressint lis cognossincis in materie. Al decidè che tal zardin la struture gjeometriche di prime e ves di coesisti cu la gnove impostazion; cussì, in face des areis primitivis centrâls, al plantà dilunc des parts perimetrâls boschetis di simpriverts metudis su di un nivel plui bas rispiet ae vile (corispondent al cors dal Cuar).
Pe presince di claps menâts dongje des gjavis di Cronberg, la cleve di colegament jenfri lis dôs diviersis cuotis e fo clamade zardin dai crets. L'efiet senografic une vore carateristic al fo enfatizât dal sfuei plaçât te bande inferiôr e formât di une voltade dal Cuar. Al alternà in maniere savinte elements scultoriis tant che l'Hecateion dal secul II d. di C rivât di Aquilee o lis statuis sietcentescjis, in part rivadis di altris proprietâts dai conts, a eliçs, pins, peçs, cocolârs, cedris dal Liban, ciprès, morârs, cjastinârs salvadis, frassins, miluçârs ingranâts, cjariesârs, gnespolârs e po magnoliis, leandris, garofui, glicinis e cameliis. Al plantà te bande alte dal zardin dai crets il rôl dal sûr – vêr svant pe epoche – biel che aes speciis di flôr e fo destinade cualchi zone delimitade (strop da pît de statue di G. Coronini o tal zardin dai crets); dulà che si pues rimirâ il magnific esemplâr di Camelia japonica, aromai plui che centenari, intune piergule dongje dal viâl.
Une piçule pinede e fo plantade su la culine di risulte, dongje dal templut circolâr che, tant che coronament de opare, al fo fat sù tal 1914. Nome tal 1944 po si fasè cualchi intervent, pal plui sul daûr de vile, ma tal complès il parc al à inmò lis carateristichis origjinariis.