Gabinetto numismatico

Cumò la colezion numismatiche no pues sei visitade dal public. E je stade creade sul tacâ dal Votcent in gracie di cetantis donazions. E documente la evoluzion dal colezionisim talian in chest cjamp, cun la abitudin di dâ plui spazi aes monedis romanis oltri che a chês greghis; in zonte si cjatin ancje monedis de Ete di Mieç e di diferents stâts talians rivant fin aes monedis di cjarte. Chel che al tacà la colezion cuntune donazion, al fo il cont Tartagna che al consegnà il so patrimoni ae citât, daspò al rivà Cigoi che si fasè cognossi par un grant numar di fals di autôr (riproduzions dal Votcent di monedis antighis) che vuê a cjapin il non di fals cigoians e che a son une vore ricercjâts e studiâts. Dongje di chescj si à di ricuardâ ancje l’abât di Aquilee Del Negro e i nobii de Brandis e Colorêt Mels. Cun chestis donazions si puedin contâ sui sessantemil tocs, dulà che no mancjin monedis di grant interès: si segnale lis dracmis venetichis, lis monedis celtichis di arint o chês coniadis a Aquilee ma ancje, lant vie pe ete di Mieç fin ae ete moderne, une nomenade monede di Palman.