Museo archeologico

Logât a plan tiere e al mezanin dal cjistiel, al da acet a une ricje colezion di manufats che a vegnin di sgjâfs archeologjics, acuiscj e donazions privadis. Jenfri chestis ultimis e je pardabon rimarchevule chê di Francesco di Toppo (1883) cun testemoneancis une vore impuartantis di oparis di ete romane saltadis fûr dai sgjâfs intes necropolis di Aquilee: un corpus siôr di ceramichis e ambris. In particolâr si segnale un grup cetant biel cun piruç, miluç ingranât e doi datui, poiât suntune fuee di vît, vere opare mestre dal artesanât dulà che a son stadis valorizadis lis trasparencis naturâls de resine. E je di Augusto de Brandis la biele racuelte cun esemplis magnifics di creps e vâs de Grecie o de Magne Grecie che a vegnin dal meridion de Italie. A chest materiâl si zonte chel che al ven dai sgjâfs archeologjics puartâts indenant a Udin e dulintor tacant dai agns Otante. Cun chescj si à recuperât cetancj documents de produzion ceramiche locâl (par esempli de fornâs di vie dai Bernârs) o che a vignivin di altris zonis.

A concludin il percors espositîf de part archeologjiche, dôs tombis tornadis a fâ sù cui lôr scarsanai e i ogjets di ete longobarde che lis furnissin, ma ancje une sezion di pieris e di sculturis cun reperts che a vegnin di bandis difarentis. Une vore impuartante pe storie e je la colezion Cigoi cui sigjîi di fameis nobilis locâls, personalitâts e fradaiis (culì fotografadis), ma ancje cualchi bacheche cun medais dal secul XX e tocs lavorâts di aur di ûs personâl e di cult. Jenfri i furniments liturgjics no van dismenteâts doi ogjets: un maraveôs cofanet in avoli, cuar neri e lens difarents de buteghe dai Embriachi, che e lavorave a Vignesie intal Cuatricent, e un cristal preziôs dal secul XVI une vore rafinât, fat dal intaiadôr visentin Valerio Belli che al rapresente la Adorazion dai Trê Rês.