Museo del territorio

Il patrimoni dal museu al è formât di une vore di oparis e ogjets dividûts in trê sezions fondamentâls: archeologjiche, storiche artistiche, etnografiche. I ogjets, conservâts timp indaûr intal palaç Masetti-de Concina, intal 1981 a son stâts metûts intal claustri dal Cinccent dal ex convent dominican.  La visite al museu e scomence al plan tiere dulà che, framieç di antîcs struments di vore e di economie domestiche, si davuelç il percors etnografic siôr di ogjets che a mostrin lavôrs di une volte tant che chel dal garzadôr, dal cjaliâr, dal marangon e vie indenant. Si va indenant al plan parsore cun reperts archeologjics, che a vegnin dai sgjâfs dal 1984-85 fats inte zone dulà che al jere il cjistiel di Sant Denêl inte Ete di Mieç: tocs di ceramiche e vues dai secui XI-XIII; piçui bronçs di vuerîrs di periodi preroman; anforis, fibulis, monedis che a  van de metât dal secul I p. di C. al secul IV d. di C; framents di marmul de ete di Carli il Grant e in fin la base di fusion di une cjampane patriarcjâl. La ultime sezion dal itinerari dal museu e je dedicade aes oparis di art sedi di piture che di sculture. Lis arts plastichis a son rapresentadis cemût che al covente di une grande part dal lassit Vidoni cun piçui bronçs e sculturis di piere contemporaniis, ma a risaltin, sedi pe bielece imponente che pal grant valôr storic, dôs sculturis di len dal secul XV: il magnific altâr atribuît ai venezians Paolo Amedeo e Michele Bono, che a faserin, cun probabilitât viers de metât dal secul, cheste opare magjistrâl lavorant a intai dodis sants dividûts in doi plans tant che corone de Madone cul Frutin, dominâts di un Crist in Pietât. Ancjetant significative e je la Lamentazion sul Crist muart di Leonart Thanner, uniche opare cognossude dal intaiadôr bavarês fate intal 1488 pe glesie di Sante Marie de Frate in Sant Denêl. La visite e finìs cuntune pinacoteche une vore furnide dulà che a son in esposizion pituris e framents di afrescs di etis diferentis (dal secul XIV al secul XX): fra lis tantis oparis si puedin rimirâ un piçul altâr che al ten dentri la pale di Sant Florian dal secul XVI e une Crocifission dal stes periodi ancje cheste di autôr scognossût; la Madone dal Carmin di Eugenio Pini (1600-1654) o ben la Polse intent de fuide in Egjit realizade intal XVII secul di un pitôr scognossût e che e ven dal lassit Vidoni cussì come tantis altris telis che a puedin jessi metudis pal plui inte aree contemporanie.