Museo di Ragogna

Logade al plan tiere dal Centri Culturâl dal Comun, in localitât Sant Jacum, la esposizion e dopre materiâl cjatât intant dai sgjâfs archeologjics fats dal dot. Antonio Cerutti e dal grup archeologjic di Reunia di Ruvigne. In dì di vuê il percors al è fat dome di une part naturalistiche cun cualchi testemoneance archeologjiche dal timp preistoric; pal moment ancjemò no si pues viodi i manufats che si cjatin inte zone dal Cjistiel (che a van dal secul XI al XVIII). Pont di riferiment de mostre al è l’anfiteatri morenic dal Tiliment dulà che la mont e il lât a àn une grande impuartance: lis formazions gjeologjichis e l’ecosisteme a son esplicadis in mût clâr cul jutori di panei didatics, erbaris e esemplârs di flore e di faune dividûts par habitat. Dai animâi si passe ae cognossince dal om, scomençant de sô prime aparizion su la tiere, cuntune schirie di ogjets che a van dal Mesolitic Resint al Neolitic Antîc. Cheste fase, presinte cuntun insediament sul lât di Ruvigne, e je stade frontade intun mût didatic empiric, bon par capî il sisteme di lavorazion de silice. Si passe duncje al ambient e ae influence che al à vût su la economie locâl, cuntune descrizion dedicade aes grotis e ai fenomens di carsisim, aes minieris di lignite dai inizis dal Nûfcent e aes gjavis di tof.