Museo etnografico del Palazzo Veneziano

Il museu screât intal 1990, si propon di ilustrâ un teritori, chel de Val Cjanâl e dal Cjanâl dal Fier, che al è stât fin de preistorie un pont di incuintri des culturis furlane, carinziane todescje e slovene. L’itinerari dal museu si davuelç in trê plans. Ogni plan al svilupe un teme diferent: lis sîs salis al plan tiere a son dedicadis al teritori de Val Cjanâl; tal prin plan si conte la storie dal palaç intant che tal secont, cu la esposizion di struments di lavôr e di une documentazion iconografiche, si puedin cognossi i ciclis di produzion e il gjenar di ativitât imprenditoriâl carateristics de zone dal secul XVI al XIX. Si scomence il percors analizant l’aspiet gjeologjic dal teritori; une serie di campions di claps, cun fotografiis, a son testemonis dal interès gjeologjic e paleontologjic de zone segnade ancje di une fuarte sismicitât. Interessante la sezion dai fossii cuntun panel didatic che al ricostruìs la evoluzion dal mont vivent dividût par speciis (plantis, moluscs e v. i.) e par periodis (archeozoic, paleozoic e v.i.). O vin daspò la tierce sale dulà che si specifiche miôr la storie dal om inte ete preistoriche cun testemoneancis de presince umane (come par esempli i struments in piere) che si cjatin in chest teritori fin ae ete romane. Une sale interie e je stade dedicade al event economic plui impuartant de zone: lis minieris di Raibl, presintis fin dal secul XI. La prime date sigure, di fat, e je il 1007, cuant che il Vescovât di Bamberg al cjapà possès de Val Cjanâl fasint vignî operaris pe industrie metalurgjiche. La esposizion che e ven daspò e je dovude ae volontât dai abitants, cuntun itinerari piçul ma intens de storie di ogni dì de val ricostruît doprant dâts antîcs e cul recupar dal ricuart dai viei. Il plan superiôr al è in part doprât par mostris di caratar temporani, invezit e je fisse la esposizion dai modei e dai documents che a testemonein la storie dal Palaç Venezian. L’itinerari al finìs tal tierç plan cuntune prime sezion dedicade aes ativitâts imprenditoriâls locâls dal secul XVI al XIX e une seconde sui aspiets naturalistics dal Bosc di Tarvis, lis sôs carateristichis botanichis e la struture juridiche particolâr che lu tignive peât ae comunitât de vile. In fin nol va dismenteât un vêr monument naturâl che si cjate intal zardin, un tei  (Tilia x vulgaris Hayne) di 25 metris di altece par 5,80 di circonference cun plui di 400 agns.