Museo della grande guerra

Il Museu al è stât fondât intal 1924 tant che Museu de Redenzion intal Palaç Attems (si puedin viodi lis fotos inte sale 9) e, par vie dai dams de seconde vuere mondiâl, al è stât tornât a sistemâ intal 1946. Lis testemoneancis scritis, fotografichis e i cimelis che si puedin cjatâ a dan une documentazion des operazions militârs de prime vuere mondiâl inte zone di confin di Gurize. Intes dîs salis, in gracie di une biele mostre fotografiche e de fedêl ricostruzion in miniature o in scjale naturâl des trinceis, si pues jentrâ inte realtât de prime vuere mondiâl e cognossi cui che al à elaborât la strategjie militâr al front: i gjenerâi Cadorna e Diaz.  Dal prin al è stât conservât un capot, intant che inte ultime sale si puedin viodi diviers ogjets di Diaz, come par esempli i ocjâi, cualchi letare, lis medaiis e vie indenant.