Museo di Gorizia

Inte vistite al cjistiel di Gurize si puedin ricognossi i principis struturâi e di furniment de residence principescje. Intal plan tiere taulis e dispensis vieris che a àn dentri ogjets di une volte a fasin di furniment a une piçule sale pal gustâ e a une cusine dulà che si pues viodi un biel fogolâr; a pocje distance si puedin viodi lis presons cun dongje la Sale des Armis dulà che si cjate une esposizion permanente di une colezion di riproduzions filologjichis di armis blancjis dai secui XII-XVI. Cumò si va viers des stanziis di rapresentance controlâts di une vuardie armade sculpide tal len e si jentre inte “Sale dal Cont”, grande stanzie cun sofit di len a cassetons, sede di conseis publics fin al XV secul e vuê doprade par congrès.  E ven daspò la “Loze dai Stemis”, lûc di passaç insiorât di preseadis sculturis e blasons cui emblemis di fameis nobilis di Gurize e in fin si rive ae “Forestarie”, dulà che, dentri de Sale de Musiche, si cjate une colezion di riproduzions di struments musicâi de Ete di Mieç. Si jentre cumò tal ambient plui maestôs dal Cjistiel, la “Sale dai Stâts Provinciâi” di gnûf cun sofit a cassetons. Cheste sale e je traviersade di une bande di une balustrade elegante di len;  la grande piture picjade te parêt e rapresente il sacrifici di Isac, opare di Franz Lichtenreit di Passau (1700-1775). Tal secont plan si puedin visitâ dôs stanziis: la intime Capele di Sant Bartolomiu dulà che si cjatin impuartantis telis di scuele veneziane e ce che al reste di afrescs dal secul XV; il “cjast” o “Sale de Contee” parcè che achì e je stade ricostruide la storie de Gurize de Ete di Mieç. Cul jutori di trê plastics interessants e di panei esplicatîfs si pues di fat capî la evoluzion teritoriâl e urbanistiche de citât dal secul XIII al XIX. Lis salis a finissin cu la lungje “Strade di Ronde” dulà che si pues viodi un panorame maraveôs. In fin lis indicazions dal museu nus puartin viers di une esposizion di machinis di vuere ricostruidis in dimension naturâl: fra chestis la grande catapulte, il trabuc, la ronfe.