Azienda Agricola Conte d'Attimis Maniago

Buri e à cetancj locâi e ristorants, tra chescj o segnalìn la locande “Castello di Buttrio”, la tratorie “al Parco” e l’agriturisim “Scacciapensieri”, indotât ancje di cualchi puest jet; se si vûl fermâsi di gnot si pues ancje indreçâsi ae locande “alle Officine”.
Par rivâ in paîs si pues cjapâ sei il tren, sei la coriere.
La proprietât “Sottomonte” e je logade a Buri, intal teritori dai “Cuei Orientâi dal Friûl”, un ambient culinâr di lungje tradizion vinicule. La proprietât si slargje su 110 etars cuasi ducj a vignâl, e e je de famee di passe cinccent agns. La posizion favorevule dal ambient, protezût des culinis di Buri dal aiar e de clime masse dure, e permet di coltivâ dutis lis varietâts di uis di chenti: de Ribuele Zale al Sclopetin, dal Verduç Furlan al Tocai Furlan, dal Refosc dal Pecol Ros ae Malvasie Istriane e al innomenât Picolit. Ma ancje altris rivadis di inaltrò come il Sauvignon, il Pinot Grîs e chel Blanc, il Chardonnay, il Merlot, il Cabernet Franc e chel Sauvignon e il Pinot Neri. Une particolaritât che e merete marcade e je che il 70% dai vignâi al è formât di vîts che a vegnin di cjamps di selezion clonâl. Cjamps rezûts adun cui centris di ricercje enovinicule e universitaris plui impuartants, che a permetin di fâ par sîs – siet agns piçulis vinificazions, fin a cjatâ fûr un clon plui costant e di cualitât miôr. Di chest clon, mudât in “plante mari”, esperts di fiducie a preparin i incalms pai prossims vignâi. Cun chest sisteme si pues fâ vins pardabon tipics e di cualitât alte, dal moment che un vin “grant” al nas prin di dut di une vît “grande”.