La mission

Il Consorzi al met adun cui che al è proprietari, possessôr o che al ten a cualsisedi titul cjistiei e oparis fortificadis di interès storic, come ancje i ents publics teritoriâi e i organisims di valorizazion turistiche che intal lôr teritori a cjapin dentri chei monuments, par une opare comune di protezion, conservazion e valorizazion.

La filosofie di fonde che e ispire la sô azion e je la considerazion che i monuments si salvin e si trasmetin al futûr dome cjapant plene cussience dai atôrs fondamentâi che a puedin incidi su lis sieltis che a puartin a conservâ o a distruzi chei monuments.

Il Consorzi al stime che di sigûr a son utii i intervents di tutele che, in gracie di proviodiments di vincul, a inderedin compuartaments negatîfs de bande de proprietât o des aministrazions che a àn cualchi responsabilitât. Al stime dut câs che cence la plene responsabilizazion di atôrs, proprietaris e autoritâts publichis, ogni azion pe difese e pe conservazion e devente, cul plui lâ indenant, impussibile.

Proprietaris e autoritâts locâls a àn di sei implicadis intune convinte e indurante opare di manutenzion, di conservazion e di valorizazion dai monuments fortificâts, cuntune azion di stimul, informazion e assistence che e fasi cressi une grande consapevolece su lis responsabilitâts che a pesin su chei che a àn la titolaritât di dirit privât o public su chei bens.

I cjistiei a pandin cun plui largje plenece la storie di une civiltât e di une comunitât. A cjapin dentri tocs fondamentâi di une culture e di une tradizion storiche. A àn di sei tignûts tes lôr rampidis carateristichis culturâls, architetonichis e ambientâls, e si à di tornâju a inserî tal cicli de vite moderne par tornâ a rindiju vîfs. Si pues rivâ a chest obietîf dome cjapant dentri in maniere plene e cussiente la proprietât e lis aministrazions publichis competentis.