La nature juridiche

Il Consorzi al è une Associazion cun personalitât juridiche di personis fisichis e di personis juridichis che a àn la proprietât, il possès o la detenzion a cualsisedi titul di cjistiei e oparis fortificadis di interès storic, o che a àn cualchi forme di control su chei monuments, stant che si cjatin dentri dal teritori di competence.

Si trate di un organisim che si poste cun aspiets une vore particolârs intal panorame des associazions culturâls e protezionistichis talianis. Di fat, al à un fin dal dut culturâl che e je la difese, la conservazion e la valorizazion di une des components plui significantis intal patrimoni architetonic de regjon, ven a stâi i cjistiei e chês altris oparis fortificadis come tors, fuartecis, abaziis, cjasis fortificadis e muris, che a ricjadin tal teritori de Regjon autonome Friûl Vignesie Julie.

A chest fin si stâi daûr in gracie di struments e ativitâts che a rivuardin:

1. sensibilizazion e consulence tai confronts di cui che al à la disponibilitât direte o indirete di chei bens, cun chê di promovi coretis operazions di recupar e di valorizazion;
2. assistence tal puartâ indenant lis pratichis che a coventin par rivâ insom di chês finalitâts;
3. difusion de cognossince di chei monuments e dai principis dal restauri e de rianimazion;
4. promozion di concrets proviodiments legjislatîfs, aministratîfs e finanziaris pe conservazion di chei monuments.
   

La particolaritât dal Consorzi e je, di une bande, chê di refudâ cualsisedi ativitât di rût studi e di contemplazion dai monuments, fale che chês ativitâts no sedin in mût diret e concret indreçadis ae conservazion e ae valorizazion, e di chê altre chê di ricognossi il principi che cence un diret coinvolziment dai atôrs ogni politiche o iniziative di difese e sedi destinade a sfantâsi.

Il Consorzi al è definît tant che une Associazion ricognossude, vint otignût la personalitât juridiche cun Decret dal President de Zonte Regjonâl n. 0207/Pres. dal 3 di Avrîl dal 1979. La Regjon e à concedût la personalitât in fuarce des sôs competencis in teme di istituzions culturâls. Si trate duncje di un Ent morâl dissiplinât dai articui 12-35 dal Codiç Civîl.