Giardini di Castelnuovo

Il cont Raimont della Torre Hoffer (1749-1817), siôr di Duin, Sagrât e Sistiane, ae fin des vicendis napoleonichis si dedicà cun dutis lis sôs fuarcis al cjistiel di Sagrât sielzintlu tant che residence preferide.  Al cenglà il grant parc e lu popolà cun jeurs, cjavrûi e cierfs, al curà lis plantis ruvinadis e a ‘ndi plantà di gnovis intal zardin organizât a teracis de bande di soreli a mont. Plui cu la intenzion di “dâ di vore a tantis personis disocupadis” che no cun chê di creâ une dimore sontuose, al organizà un dai complès plui significatîfs dal Friûl Orientâl par vegjetazion, estension e faune. Al insiorà il vert cun fontanis, sidreris e monuments (par esempli il piçul templi fat sù intal 1812 in memorie de femine, la contesse Valburga, che si pues viodi ancjemò insom dal viâl che de dimore signorîl al va inte direzion di Cjistielvieri). Vuê, magari cussì no, dal sflandôr di chei timps nol reste nuie a cause dai bombardaments continuâts intes dôs vueris mondiâls. Il disen formâl dal zardin propit denant de façade de vile si pues viodilu ancjemò, ma i arbussits che lu insiorin a son stâts plantâts di pôc. Lis teracis, cuasi crotis rispiet a chei timps, a viodin cressi gnûfs pomârs e ulîfs plantâts de aziende agricule che e à la propietât dal edifici. Lis unichis testemoneancis antighis a son i trê grancj rôi che cul lôr svilup ingredeât a son testemonis dal passâ dai secui.