Giardino di Miramare

Il parc di Miramare nol nas dome tant che zardin di rapresentance, ma ancje tant che sît privât; la intenzion dal arciduche a jere di fat chê di realizâ un parc di dimensions mezanis, intun puest ancjemò acessibil e crei e, duncje, ideâl par programs sperimentâi su lis speciis arboreis. Massimilian, cul jutori dal fidât zardinîr boem Anton Jelinek, al alterne zonis a prât a cors di aghe, arbui plantâts daûr di modei naturâi a sfueis, cun trois tortuôs fin a formâ une nature cuasi disordenade e salvadie, ma in realtât pilotade e pensade in ogni aspiet. Cjaminant fra il vert ancjemò in dì di vuê si pues capî la maravee di chê volte tal olmâ une vedude sul mâr che no tu ti spietis, un spazi panoramic fûr dal ordenari, un spieli di aghe improvîs. Inte realizazion dal parc a son stadis dopradis cetantis varietâts di speciis cun varie provenience:  speciis  dal puest tant che il cjarpin neri, l’eliç, il frassin,  l’arboç,  la secuoie zigante, il pin di Sabine, il ciprès di Monterey de Californie, variis speciis di cedris dal Liban; aucarie origjinarie de part meridionâl des Andis e vie indenant. Ogni tant si puedin viodi costruzions che a fermin il vert come par esempli il piçul cjistiel, copie in miniature dal edifici paronâl e che al è stât abitât in mût saltuari di Massimilian e de sô femine, o pûr la capele di Sant Canzian che, daûr de tradizion, e à tal interni un particolâr crocifìs di len comissionât intal 1900 dal fradi plui piçul di Massimilian, Ludovì Vitôr, e sculpît cun part dal len de nâf Novara a ricuart de tragjiche fin dal imperadôr dal Messic. Dongje di un spazi di impostazion romantiche, Massimilian al veve pensât ancje a une aree plui formâl, un parterre dongje dal cjistiel in face dal acès al mâr; dome cui che si svicinave ae rive e al rivave al piçul puart – in chê volte acès privilegjât – al podeve amirâ un grant splaç cun vegjetazion esotiche (che no je rivade dute fin al dì di vuê) cun palmis e juchis, ancje di une cierte dimension, par armonizâ miôr il contest e valorizâ lis statuis poiadis su altis colonis.