Palazzo Lantieri

Za tal secont deceni dal secul XVI il palaç al veve di jessi stimât tant che il plui biel de citât, par chest dopo dal 1527 al à cjapât il non di Schönhaus (Cjase biele) tant che predicjât baronâl dai Lantieri, inalore acolzûts tal patriziât Gurizan. Jenfri i ospits di Palaç Lantieri si ricuardin Carlo Goldoni, rivât culì tal 1726, e Pape Piu VI, che tant dal so viaç viers Viene tal 1783 al passà par Gurize albergant tal Palaç. Ma ancje la contesse di Chambord, femine di Indrì V che, jenfri il 1883 e il 1886, e fasè tirâ sù tal zardin de vile une piçule grote di Lourdes (che si pues viodile inmò vuê). Lis primis documentazions siguris sui zardins gurizans a van indaûr fint al Sietcent, stimât tant che il secul di aur pe storie locâl; la cartografie di chel periodi e mostre cemût che juste dongje des pertinencis dai palaçs no mancjàs mai une aree verde, ancje se dispès di dimensions limitadis, caraterizade di un implant gjeometric sempliç e platade dal edifici e de murace.
E mancje tal vert de Gurize dal secul XVIII, ma za si cjate une vore difondude tal rest de Europe, la impostazion inglese dal zardin cjapade sù, culì, nome tal secul dopo. Jenfri i esemplis citâts al spiche il zardin de Schönhaus, che salacor al dave acet a speciis ornamentâls esotichis o dut câs raris, svant dai zardins di chê ete sedi publics che privâts.
Vuê tal Palaç Lantieri si induvine inmò l’implant gjeometric dal zardin formâl vieri, cundut che tal timp lis plantis a son stadis sostituidis. Si puedin facilmentri ricognossi il viâl centrâl, che al comence dal portâl di ingrès e che al mene viers un boscut, dulà che a partissin cuatri viâi trasversâi che a dan vite a ricuadris di arbui; lis spassizadis si incrosin cussì in doi plaçâi pe polse di fate circolâr, ocupâts un di un strop e chel altri di une taule viere di piere cuvierte cuntune biele piergule.
Dilunc dai lâts dal prât (inframiezât ca e là di arbossits di epoche seguitive), cisis di bos a ripetin un motîf, che al diven salacor dal antîc disen formâl. Viers la fin dal viâl principâl lis plantis a son stadis metudis dongje fissis e in maniere libare cun simpriverts; jenfri di chescj si ricognossin maraveôs cjastinârs salvadis.