Torre di porta Villalta

Ancje la Torate di Puarte Vilalte e aparten a la ultime cente di mûrs e e je, salacor, jenfri i esemplis restâts (Puarte Manin e Puarte Aquilee) chel miôr conservât. Il Consei Maiôr al volè che e fos fate sù intal 1436 e finide intal 1440 cul aspiet di une vere fortificazion: par di fûr si presentave tant che un mûr cun bucheris e canonieris pe difese; par dentri come di ordenari, la torate e jere vierte. In dì di vuê cheste bande e je murade parcè che dal secul XVII al XVIII e à permetût la abitazion de famee dai vuardians. Di resint La Torate e riscjà plui voltis di sparî, il câs plui strani al fo cuant che, sul finî dal secul XIX, i citadins a discuterin su la ocasion di butâ jù la costruzion zaromai mâl in sest.

Di chel moment la croniche e à lassât une citazion scrite, metude di un anonim su la puarte de torate restade in pîts: «Quando dei Turchi si temea l’attacco / a te volgean le donne la preghiera / Or che è vecchia, un cittadin bislacco / ti dà l’ultimo calcio e buona sera!».

Sede de Societât Furlane di Archeologjie, dentri de torate al è un laboratori di restaur, une piçule biblioteche e une moderne esposizion di reperts archeologjics. Jenfri i ogjets plui antîcs si cjatin diferentis tipologjis di imprescj di clap di ete neolitiche, cuant che in chês altris bachechis o vin i reperts di Palaç Ottelio cun ogjets di tipologjie diferente (plats, scudielis, vâs, ornaments personâls, e v.i.) e une vore di ogjets recuperâts in place dai Lens (place Venerio) inte zone dulà che al jere l’antîc Palaç Savorgnan.