Museo della fotografia

Il Museu de fotografie al è stât vierzût di pôc cun chê di esponi ai visitadôrs imagjins di panoramis, avigniments, monuments e dut ce che al rivuarde la storie artistiche etnografiche di dut il Friûl.

Il percors al tache cun origjinâi dal Votcent che pal plui a àn par sogjet monuments e testemoneancis artistichis locâls: tra dutis e je interessante la prime fotografie scatade intal 1856 di un autôr furlan, il cont Augusto Agricola (1819-1857), che al ritrate cualchi personaç sul sfont de Loze di Sant Zuan in place Contarene. Daûr dai panoramis a vegnin i ritrats, gjenar che i fotografs di chê volte a praticavin une vore, a son ricuarts di cerimoniis, nuviçâi o gnocis. Al è stât esponût ancje un album di famee (fin dal Votcent, prins agns dal Nûfcent) cun fotografiis intai formâts clamâts storics e eseguidis dai studis plui impuartants di Udin. Tra i autôrs des imagjins di cheste sale si cjate dispès Silvio Maria Buiatti (1890-1982), un dai plui grancj esponents a nivel european de tindince pitoriche in fotografie, cetant difondude intai agns Trente; al è autôr ancje di cualchi viodude inte sale daspò, dedicade al paisaç, al lavôr e ae societât.

Il voli al vualme in chest spazi cualchi moment de realizazion de Ferade Pontebane (dal venezian Carlo Naya), al sint la fature des feminis cu la cosse o la devastazion dal taramot di Verzegnis dal 1928 (Luigi e Carlo Pignat), si ferme su cualchi esempli di localitât dal Friûl, tant che Lignan e Grau, o di ativitâts artesanâls e industriâls vieris (Attilio e Giuseppe Brisighelli).

In chest biel viaç intal timp si pues tornâ a vivi, in gracie di gjigantografiis maraveosis, il dentri dai studis Pignat e Buiatti e tocjâ cun man chel straordenari strument che al à permetût di fissâ il passât: une maraveose machine fotografiche antighe.