Lapidario Tergestino

Il progjet espositîf resint al à permetût di racuei lis testemoneancis plui impuartantis dal ort lapidari dal Civic Museu di Storie e Art par creâ un museu logât intal bastion Lalio dal Cjistiel di Sant Just.

I ogjets di piere dal I-II secul daspò di Crist a son stâts dividûts daûr de zone di divignince in trê salis. La prime (sale A) e racuei i rescj di cualchidun dai monuments publics plui imponents e indicatîfs che si cjatavin insom dal cuel di Sant Just: la Basiliche civîl, il Propileu (o jentrade monumentâl) e il Templi capitolin. Che chest edifici sacri dedicât a Jupitar, Junon e Minerve, al fos esistût par da bon al è confermât dal fat che si à cjatât une piche piramidâl cun, sui lâts, lis trê figuris capitolinis.

Inte sale B si cjatin il materiâl de Basiliche forense, framents di iscrizions imperiâls, monuments onoraris di citadins nomenâts e tocs di statuis. Cualchi toc al presente modifichis curiosis parcè che tornât a doprâ in etis difarentis: par esempli un ritrat dal imperadôr Neron tornât a sei lavorât par rapresentâ il so sucessôr Vespasian o un rilêf cul cjâf di Jupitar tornât a doprâ pal cjampanîl di Sant Just.

Inte ultime sale si viodin i monuments funeraris che a vegnin des necropoli di Triest, i materiâi leâts ai cults e ai edificis sacris e cun di plui ce che al è stât cjatât dongje dal Teatri Roman. La esposizion e je furnide di spiegazions su panei che a judin a ricostruî i edificis publics, lis abitazions de citât, la storie di Tergeste e dal sisteme difensîf, cun chê di dâ un cuadri complet dal insediament roman a Triest.