Museo Civico di Storia ed Arte

Il Museu di Storie e Art al ven fûr dal Museu des antichitâts dal 1873, che lis sôs racueltis a forin tacadis e conservadis de Academie dai Arcadis Sonziacs inte seconde metât dal XVIII secul. Dal 1913 si è zontât al Ort lapidari (che al esisteve za dal 1843). Si è cussì dât dongje un unic complès inaugurât intal 1925, daspò de ristruturazion.

Si jentre intal museu passant par un zardin siôr di reperts di piere che fra mieç al risalte un piçul templi; dentri al regne un monument funerari dedicât a un famôs studiôs di antichitâts, J. J. Winckelmann, copât a Triest intal 1768.

Une volte jentrâts intal edifici, il percors a va indenant dilunc vie siet salis, che trê si cjatin a plan tiere e a son sioris di reperts che a vegnin di donazion di privâts. I ogjets, di origjin romane e egjiziane, a son stâts racuets in cetantis vetrinis daûr de lôr funzion e dal materiâl che a son fats: si viodin alore intes salis romanis lums di formis difarentis (dal VI secul prin di Crist al VI daspò di Crist), recipients pal balsim e altris recipients di veri, piçui ogjets doprâts pal plui tant che decorazions (come fibulis, spilis par cjavei, anei), sculturis di marmul e piçulis sculturis di bronç; la plui part dal spazi de sale egjiziane al è ocupât dai sarcofacs (che un al à dentri la mumie) e di altris bachechis cun statuis di divinitâts, amulets, furniments.

Parsore o cjatìn ancjemò ogjets metûts adun par zone di divignince e mostrâts come che al jere costum tal Votcent; rivâts intal museu in gracie des donazions de famee Sartorio, a son vâs, ancje grancj, che a vegnin di cetantis bandis (Etrurie, Corint, Lucanie e vie indenant). Lis salis che a restin a mostrin impen, reperts che a vegnin di necropolis, cjastelîrs, e landris tant che Cjaurêt, Redipulie, Sant Canzian, Sante Luzie di Tulmin.