Museo Paleontologico della Rocca

La roche e conten une esposizion permanente tignude dal Grup Speleologjic “Amici del Fante” che in plui di cincuante agns di ativitât al à cjapât sù cirche trentemil tocs. Dome une piçule part di chest materiâl al è stât doprât pe esposizion che e je stade volude cun panei didatics esplicatîfs par judâ la comprension dai fossii in mostre dal moment che chescj a àn di jessi mieçs di informazion e no ogjets destinâts dome a jessi amirâts. Lis salis a son dôs une parsore di chê altre e a tegnin disenûf vitrinis; al plan tiere lis primis cinc a spieghin in mût clâr il significât de paleontologjie, la sience che e studie par mieç dai fossii la evoluzion dal nestri planet, dai siei climis, i siei aspiets morfologjics, la manifestazion e la evoluzion di formis di vite intes etis prime de vignude dal om. Inte vitrine dopo e je ilustrade la struture gjeologjiche dal Friûl e de Provincie di Triest dividude in sîs zonis che a vegnin descritis intai lôr elements principâls e plui rapresentatîfs. O vin a chest pont une serie di vitrinis (in part tal prin plan e in part tal secont) ognidune cuntune serie di reperts metûts in ordin cronologjic cun provenience di un o di plui dipuesits di fossii des areis gjeografichis nord orientâls. Si scomence cussì cui rescj plui antîcs che a vegnin di Casere For (Udin) e che a partegnin al periodi Carbonifar (ete Paleozoiche, cirche 300 milions di agns indaûr) dulà che a son presints i trilobitis. A jerin chescj il plui antîc grup di vertebrâts dal mâr, dotâts di un sisteme visîf complès e clamâts cussì parcè che la lôr corace esterne e jere dividude in trê parts. Al stes periodi i partegnin ancje i brachiopots, de zone di Riu Bombâs (vitrine 8), che a fasin part dai invertebrâts dal mâr rapresentâts ancje vuê di 250 speciis, i fossii di felets e di codis mussinis cjatadis inte zone di Pramuel (Udin) e i rescj di Psilofitâi, Licopodiâi, Ecuisetâi e Pteridospermis (dutis plantis che a formarin i prins boscs) cjatâts intal dipuesit di Lance. Il percors de esposizion al va indenant tal plan disore dulà che un ipotetic troi nus puarte inte ere Mesozoiche (dai 230 ai 65 milions di agns indaûr) e in particolâr dal Triassic (zone di Raibl, Riu Barbar), Jurassic (dipuesits di Boscochiesanuova, Garzon e dal plan di Asiago – Verone) e Cretacic (cul Cjars di Gurize e di Triest e cun Vernàs - Udin). Lis ultimis cuatri vitrinis a mostrin l’habitat de ere Cenozoiche dividude intai periodis Eocenic (cirche 50 milions di agns indaûr) dai dipuesits dal Cjars istrian e di altris zonis dal Venit, Oligocenic dal Monte Baldo (Verone) cun esemplis di crustacis e in fin Pliocenic cun ogjets dal dipuesit di Cornuda (Trevîs)