Museo documentario della città

Chest museu, viert intal 1984, al è un museu documentari che al à il proposit di fâ une ricostruzion de memorie de citât e de fuartece par mieç di documents, ogjets e testemoneancis orâls. Si scomence, daûr di ordin cronologjic che al tache de scune de citât di Gardiscje, cuntune esposizion di fossii esplicade di panei grafics che a analizin la evoluzion de aree di 50 milions di agns indaûr fin al dì di vuê. La prime sezion e je dedicade al “Flum” tant che artefiç di un mont economic, sociâl e difensîf che al segne il rapuart profont fra il teritori e i siei abitants. O vin daspò la sezion intitulade “L’insediament”, cun pieris dal timp roman (I-III secul d.d.C.), fra chestis in particolâr un cjâf di om di ete claudie; chi e je ilustrade la presince dal stât roman, aministradôr diret de zone pal so interès strategjic rilevant. Daspò e rivarà la dominazion langobarde che e doprarà il puint di costruzion romane tant che pont principâl dal so sisteme difensîf. Une piçule sale laterâl e fâs di soste intal percors storic: a son in esposizion telis di autôrs no cognossûts e tocs di afrescs in particolâr chei che e vegnin dal Domo e realizâts di Giulio Quaglio. Si va indevant te storie  cun “Vignesie, Massimilian, i Turcs”; il domini venit al cambie la piçule vile contadine intune prestigjose fuartece indispensabil ae Serenissime tant che difese cuintri dai siei plui grancj nemîs: Massimilian di Asburc e i Turcs. In cheste sezion e je une prevalence di ogjets doprâts pe difese (spadis, fusîi e altris armis dal secul XVI al XIX) e plui di dut e je di notâ une armadure turche complete forsi de fin dal secul XVI o dal inizi dal XVII. “Aqin” al memoree lis siet incursions dai Turcs, improvisis e sostignudis di une tecniche une vore rafinade, grazie a di une instalazion grafiche insuazade des antis di une vecje puarte che e ilustre lis testemoneancis dai varis episodis. Inte cuinte sezion, “La machine di vuere”, si tabaie dal progjet difensîf di Vignesie cu la realizazion dal prin nucli fortificât vignût sù dal nuie. I lavôrs si sviluparan in trê fasis dal 1474 al 1511, ma no cate i sfuarçs dal Venit e ancje dal Friûl, intal 1511 Vignesie e cedarà e Gardiscje e passarà sot de Austrie. Dut câs, la esperience di Gradiscje, lis cognossincis e i erôrs di chest progjet a saran la base pe nassite, cirche un secul daspò, de citât fuartece di Palme. La esposizion e finìs cul cjanton de “Comunitât ebraiche di Gardiscje” cun testemoneancis fotografichis e documentariis dai aspiets economics, urbanistics e religjôs tipics dai ebreus che a àn vivût achì dal secul XVI al XX.