Medioevo a Valvasone

La manifestazion si fâs ogni an un vinars, sabide e domenie di metât Setembar. Ogni edizion e cambie teme e senegjature, rivocant fats e vicendis sucedûts pardabon te Patrie dal Friûl e tal feut di Voleson, e tornant a fâ vivi zornadis ispiradis ae vite tant dal secul XIV.
La sabide sere aes vot, dilunc de manifestazion, si imbastìs une cene medievâl di flabe, che par partecipâi o vês di notâsi; cui che al vûl svicinâsi ae cusine tipiche, simpri ispirade ai savôrs antîcs e locâi, ma inzornade al gust di vuê, dentri de suaze carateristiche dal borc, al pues sielzi jenfri doi ristorants une vore particolârs: Alla scala e Alla torre. In chest ultin, in gracie de passion storiche culinarie de parone, pal plui si proponin ricetis dai secui stâts. Cun di plui si pues sielzi ancje tra i diviers barachins prontâts pe ocasion, dulà che o cjatarês un grum di goloseçs antîcs e no.
Par trê dîs il borc al è popolât di armâts, soldâts di venture, cavalîrs, scudîrs, popolans, cortesanis, ustîrs, artesans, musics, mangjefûc, ducj in costum e impegnâts dut il timp a davuelzi lis lôr antighis mansions. Cussì centenârs di figurants a tornin a puartâ il borc al so sflandôr vieri e i visitadôrs a àn la impression di vivi tal passât.