Torneo delle tredici casade

Il torneu des Tredis Cjasadis al intint di memoreâ i torneus cortês dal Tresinte, si ben intune atmosfere di liende: il Torneu al è bandît in onôr des Cjasadis Triestinis, rapresentadis des fiis di done Buere e dal mitic eroi Tergjesteu, che al à dât in non ae citât.
La zornade e comence la buinore cu la fiere medievâl, siore di artesans e marcjadants che a rivin de Slovenie, e zûcs di strade organizâts di figurants dal Friûl. Il torneu vêr al comence subit dopo gustât e al va indevant fint a gjespui cu la esibizion, tra un combatiment e chel altri dai cavalîrs, di sbandieradôrs, cjantôrs, balarins e bufons, biel che la sere al ven prontât un grant banchet medievâl. Lis fiis di done Buere a sielzin i lôr campions jenfri i tredis cavalîrs par onorâju cui colôrs de lôr Cjasade.
Dodis cavalîrs, sîs in rapresentance dal Friûl e sîs in rapresentance de Carniole (Slovenie) si sfidin, armâts di scût e di spadon, intun torneu cortês che, eliminant man man i contendents, al puartarà ae vitorie il plui valent, che però al varà di frontâ il vincidôr de edizion prime, clamât il Cavaliere della Buriana. Al è chest il titul che, intune sugjestive cerimonie, al ven dât al vincidôr dal torneu, gnûf custodi dal mitic spadon de Magnifiche Comunitât Tergjestine par un an.