Mostron

La dì di sabide, cul Mostron, si intint di memoreâ – cuntun corteu storic in costum - un dai acjadiments plui impuartants de vite medievâl triestine, o ben la rassegne anuâl che il Comun al faseve par mostrâ ae citadinance lis miliziis cjoltis pe vuere esterne.
Al Mostron i vignive daûr une grande fieste insiorade di banchets e torneus cortês.
Cul corteu la Magnifiche Comunitât Tergjestine e presente ae citât di Triest i cavalîrs dâts dongje pal Torneu des Tredis Cjasadis.
Aes sîs di sere, te basiliche di Sant Just, i nobii des Tredis Cjasadis, cui ceris impiâts, a assistin a une funzion religjose cun musiche e cjants gregorians.
Ae fin de cerimonie i nobii si dan adun cul corteu che intant si è dât dongje fûr de basiliche, par començâ la sfilade che e travierse lis viis principâls de citât cu la partecipazion di sbandieradôrs, musics e bufons, notabii e nobii. Il corteu al va indevant par piazza Unità dulà che si fermarà pe esibizion dai sbandieradôrs dal borc ros di Faenza (zimulât cu lis Tredis Cjasadis). Ae fin de sbandierade il corteu si invie par place Sant Antoni, dulà che bufons e mangjefûc si esibissin in zûcs di strade medievâi. Ae fin des esibizions il corteu al finìs, biel che la Magnifiche Comunitât Tergjestine e jentre te glesie di Sant Spiridion, dulà che la corâl de comunitât religjose serbe ortodosse e presente un conciert di cjants popolârs medievâi.