Sagra dei osei

Te citadine di Sacîl si rive dai centris maiôrs in gracie dal servizi public di corieris e di trens. Tai dîs de manifestazion si prontin un grum di bancuts dulà che o podarês svicinâsi ai savôrs tipics di chescj lûcs. Se invezit o vês gust di cerçâ la cusine locâl in puescj plui cuiets, il borc al proferìs senaris une vore sugjestîfs tant che il finissim ristorant Il Pedrocchino e i locâi All’antica osteria, La Piola e Cavour.
Ai 2 di Avost dal 1274 i citadins di Sacîl a domandarin e a otignirin dal Patriarcje di Aquilee che il marcjât di Sant Laurinç, fat fint in chel moment fûr des puartis de citât, si fasès dentri des muris. Di chel moment a vuê, ogni an te prime domenie dopo Madone di Avost, si fâs la tant innomenade Sagra dei osei. Il moment plui sugjestîf e je la albe de domenie, cuant che sul cricâ dal dì e partìs la gare di cjant, e une comission di esperts e vote i uciei campions par ogni categorie in concors (pes speciis che si puedin inmò cjapâ). Simpri te stesse dì si davuelç ancje la mostre dai dumiestis: ancje chê e rapresente la continuitât storiche cul vieri marcjât di Sant Laurinç.
Altris iniziativis a insiorin il vast panorame che e proferìs la manifestazion: la gare di vuit, dulà che si sfidin i miôr imitadôrs dal cjant dai uciei, la mostre de mîl, la rassegne vins D.O.C. dal Friûl Vignesie Julie, la esposizion di armis di cjace, spetacui e concierts par ducj i guscj.