Sagra dai sèst

Ogni an, te prime domenie di Setembar, si davuelç la famose Sagre dai sescj, che e cjape il so non dal cos – clamât a lenti sest - e che e svante aromai une vore di edizions. I cos si dopravin soredut pes vendemis, che a comencin propit jenfri Setembar e Otubar. Dongje dal paîs, in face de risultive de Livence, al è un lûc a forme di cjadin clamât Palù che al è stât bonificât te prime metât dal secul XIX, siôr di materie prime: il venc. Par secui cheste zone e je stade impleade pe produzion di manufats grancj e piçui: i sescj. Vuê l’artesanât al prodûs, oltri ai manufats tradizionâi, ancje lis gnovis liniis e une siore serie di ogjets pal furniment. Oltri ae produzion di venc o podês cjatâ ancje produzions artesanâls di len, ram e fier batût, che a coronin la manifestazion principâl.

Tal cjistiel di Polcenic si rive dai centris maiôrs dongje in gracie dal servizi public di corieris. Intai dîs de manifestazion si prontin un grum di barachins dulà che o podarês svicinâsi ai savôrs tipics di chescj lûcs. Se invezit o vês gust di cerçâ la cusine locâl in puescj plui cuiets, il borc al proferìs senaris une vore sugjestîfs tant che: Da Zaja, Le cascate e Da Regina. Da segnalâ, cun di plui, il locâl public Al Gorgazzo, li dongje, insedât intun zardin naturâl tant plasevul che al cjape dentri la risultive dal Gorgaç, un dai lûcs plui carateristics de regjon.