Rievocazione storica in costume

La seconde domenie di Lui e met dongje doi events impuartants de storie de citât: la Fieste dal SS. Redentôr, patron dal Domo Dogâl di Palme, e la Rievocazion Storiche. Cu la rievocazion si intint di memoreâ un fat impuartant sucedût tal Lui dal 1602, cuant che Gerolamo Capello “Proveditôr Gjenerâl de Patrie dal Friûl” al fasè tirâ sù tal centri de place la bandiere de Serenissime Republiche di Vignesie. In chê dì centenârs di lôr si vistissin cun costums preziôs, elms e coracis par tornâ a creâ la stesse atmosfere di cuatricent agns indaûr.
Nobii e donis si esibissin in danzis di cort, i cavalîrs a dan prove de lôr bravure cuntune parade di cjavai, biel che alabardîrs e pichîrs si esibissin cu lis armis, rapresentant atacs e manovris militârs; dut cuant al fâs di suaze ae alçade dal grant Confenon cu la figure dal Leon di Sant Marc.
La zornade e finìs sore sere, cuant che la lûs balarine dai ferâi e compagne il Confenon che al ven tirât jù, e che al tornarà a sflocâ sul Standart di Place Grande l’an cu ven. 

La citât fuartece di Palme e je indotade, tant che une citât moderne, di un grum di albiercs, ristorants e enotechis gjavâts fûr di ambients vieris fats sù dentri dal zîr des muris. Si pues rivâ te localitât par mieç di corieris e trens.