Palio della scure

La prime domenie di Jugn si davuelç a Gardiscje il Pali de Manarie, organizât de Academie Jaufrè Rudel di studis medievâi in colaborazion cul comun de citât fuartece. La idee e salte fûr di une ricercje di archeologjie sperimentâl, fate de sezion de Academie che e studie la vuere medievâl, sul ûs des manariis di vuere di fate francje (francische) e di fate scandinave.
No je duncje une rievocazion storiche, ma un mût par puartâ une arme di vuere viere a une dimension ludiche. A ‘nd è un regolament e i contendents de gare a son une scuadre di Strassolt e une, juste apont, di Gardiscje. La disfide si tornarà a fâle a Strassolt la prime domenie di Setembar.
Il pali al è un tîr a plui bersais cun distancis che a variin dai cuatri ai dodis metris; tîrs che si fasaran sedi cu lis piçulis francischis che cu lis grandis manariis danesis. A partecipin ae manifestazion i famôs balestrîrs toscans di Massa Marittima (Grosseto), che dutun cui lôr sbandieradôrs e tamburins a fasaran tornâ a vivi la gare (tra nûf balestrîrs, trê par tercîr) che par une tradizion tant antighe si fâs a Massa Marittima la ultime domenie di Mai. Lis balestris dopradis par cheste manifestazion a son lis grandis e potentis balestris di pueste. Alfin no mancjin esemplis di duei cun armis blancjis e tîrs dimostratîfs cun balestris di braç.