Messa del Tallero

Par tradizion ai 6  di Zenâr a Glemone si torne a celebrâ la usance viere che e à lidrîs te Ete di Mieç: la Pifanie dal Talar.
Te suaze medievâl di vie Bini, il corteu storic, cui tambûrs che a ritmin il procedi des cortesanis e dai cavalîrs, al compagne il Sindic fin tal Domo di Sante Marie Assunte, là che si davuelç la Messe dal Talar. Intant de funzion religjose la Comunitât Civîl, rapresentade dal Sindic, e ufrìs ae glesie, tes mans dal Arcipredi, un don concret, un talar di arint, tant che segn di sotanance dal podê temporâl a chel spirituâl.
La cerimonie e à tancj aspiets rituâi che nus son rivâts compagns daspò secui: a son i stes che il Cjapitani dal Popul, rapresentant de Magnifiche Comunitât di Glemone, i faseve al Plevan, rapresentant de autoritât religjose. La consegne dal talar, il corteu dai nobii cui lôr vistîts di siôrs, compagnâts dai tambûrs e cu la scorte des vuardiis, la animazion medievâl e la esibizion dai sunadôrs pes stradis dal Centri Storic a son un altri aspiet di interès pai amants di cheste ete e di chestis tradizions secolârs.