Rievocazione storica

Ae figure di Massimilian I di Asburc si ispire la rievocazion storiche organizade a Cormons. Fin de buinore, dut il centri al ven jemplât di bandieris e grancj confenons che a rapresentin lis stemis des fameis vieris de Contee di Gurize. A 3 dopomisdì e tache la rievocazion cul lunc corteu, fat di uns cuatricent figurants che si davuelç a pas di parade pes stradis dal centri. Nobii, cavalîrs, bufons, popolans, a compagnin il cjar dal Imperadôr fin tal cjamp sportîf là che si fâs il torneu cavalaresc cun grups internazionâi specializâts tal doprâ lis armis blancjis. A son i Espadrones di Bratislav e i Dominik di Praghe che a rapresentin cun fedeltât il torneu cavalaresc come te epoche di Massimilian I; e je interessante ancje la presince dai Lanzichenecs (cuarp militâr inmaneât dal Imperadôr) e dai spadacins che a vegnin de Scuele di Scherme dal Friûl Vignesie Julie che si provin in duei e bataiis.
Ancje i sbandieradôrs cui lôr tîrs coreografics a memorein Massimilian I, mostrant la lôr braure e abilitât tal voltolâ lis bandieris. Aes 17.30 si lei il Proclame Imperiâl - che l’origjinâl al è ancjemò tignût di cont tal Municipi di Cormons - e ae fin de leture al torne a tacâ il torneu cavalaresc. E po si fâs une ricostruzion dal ambient di une volte cui marcjâts de fin dal 1400 e lis betulis tipichis.