Palio di San Donato

Pe fieste di Sant Donât (ai 21 di Avost), patron de citât di Cividât, si usave fâ il Pali e organizâ diviers torneus intune suaze di divertiments maraveôs, li che a levin nobii e popolans.
Tai anâi de Magnifiche Comunitât, l’an 1368 si lei che al fo fat un statût di fâ cori il Pali par simpri, a cjaval e a pît, te dì di Sant Donât. Chest al rapresentave un fat cognossût di tant timp, cemût che si capìs dai libris dai cjamerârs che o vin ancjemò: Durlì di Cividât, par esempli, tal 1361 al notave lis spesis par netâ lis stradis là che si sarès fate la gare. Il premi pal vincidôr des garis al jere un Pali, trofeu une vore ambît ancje pal valôr dal tiessût; cun di fat, par che al fos a pâr cu la innomine de citât, no si sparagnave. Tal 1484 il Pali dal Comun, metût fûr il dì di Sant Donât per esser balestrato, al jere di panine; al podeve sei di damasc cremisin, damasc zâl o altri, in ogni câs de miôr cualitât. L’ultin classificât al vuadagnave la purcitute, o un sparvâl o un gjal.
Lis corsis a cjaval si fasevin par solit ator dal cjampanili dal Domo fin ae piere de corse, di là di Gjian, clap che al esist ancjemò. Cul timp a forin fissadis lis regulis. La competizion e clamave dongje int di tancj paîs: in plui di chei di Udin, a vignivin ancje di Trevîs, di Vignesie, di Mugle. Po i cividins a partecipavin a altris palis inmaneâts di citadinis furlanis e venitis.
Dal Pali vieri (cancelât dal 1574) si torne a proponi la part a pît, cui partecipants che si misurin in garis di tîr, tant che chel araldic, ae cjampane, ae piertie, ae buchere, al targon, ai anei e in fin ae celade.