Messa dello spadone

La Messe dal Spadon si le fâs ogni an la matine dal dì de Epifanie.
Su la sô origjin si à discutût une vore ma no esist une documentazion sigure in stât di sclarî la nassite e il significât. Cualchi storic al fâs rimontâ il so principi a Grivôr di Montelongo (1251-1269), che – rivât a Cividât par cjapâ possès dal Patriarcjât – al consacrà a Diu, tal 1252, lis bandieris puartadis vie al nemì intant de vuere fate de Glesie cuintri dal imperadôr Fidrì II. Al è probabil, però, che la origjin dal event e rimonti al patriarcje Marcuart di Randeck e il vê doprade simpri la sô spade – cemût che si lei te scrite dai braçs – al sarès une conferme indirete. La cerimonie e à dôs valencis, politiche e spirituâl, dal Patriarcjât di Aquilee. Il patriarcje, di fat, nol jere dome il cjâf spirituâl di disevot diocesis ma ancje il princip di un teritori che al lave de Livence ae Save.
La funzion religjose e tache cu la procession che e jes de sagristie par lâ sul altâr Maiôr. Un protocol fis al assegne un ordin precîs ai predis che a partecipin al rituâl. Il corteu al va daûr di un zagut - che al ten sù une crôs di arint - e doi cerofars; po a vegnin i cjalunis, il sudiacun, il diacun che al à tal cjâf un elm cu la plume, la spade te man drete e il vanzeli te çampe, poiât tal pet. Par ultin al ven fûr il celebrant cun dongje il cerimonîr. A chest pont ducj i predis si voltin bande dai fedêi, il diacun si fâs indenant e al môf trê colps par aiar cu la spade, in segn di benedizion o forsit par saludâ, mot che al sarà ripetût plui voltis te cerimonie.
Finide la funzion, la procession e torne a dâsi adun tal stes ordin di partence e e torne, cun solenitât, in sagristie. Subit dopo de cerimonie si fâs il corteu storic che si davuelç pes stradis de citât e che e à il moment centrâl in place dal Domo, là che l’aralt al lei il Decret che al da al patriarcje il podê temporâl par riconfermâ ai nobii e ai vassai i lôr feuts tocjant la lôr spale çampe; in fin al da la benedizion a la int cu la spade. La rievocazion, in fuarte relazion cul rituâl, e vûl memoreâ l’aralt a Cividât - ai 7 di Jugn dal 1366 - dal patriarcje Marcuart di Randeck, figure tant amade dai cividins: intant de sô potestât in fats, al tignì lontane la vuere dal Friûl cundut che il Friûl al fos contindût fra i conts di Gurize, la Austrie e la Serenissime e al completà un cuarp di leçs in ûs fin che il Patriarcjât al colà.