Giornata medioevale

Tal Cjistiel di Cjanive si pues rivâ di Pordenon e di Sacîl cul servizi public di corieris che al servìs ben la zone. Intant de manifestazion, tal gustâ di misdì e tal desc de sere, o podarês cerçâ plats che a cjapin la ispirazion di vieris ricetis medievâls. Invezit par cui che nol olse a frontâ i savôrs dal passât, a son lenti doi ristorants: La Taverna e Gaiardin. Se o volês cerçâ il vin locâl, ma no dome, l’apontament al è pe zornade de manifestazion, sot misdì, te roche dal cjistiel, là che si fâs un incuintri vinicul impuartant.
Par solit la manifestazion si le fâs la tierce domenie di Lui e si ispire ae liende de biele Teresine, che e fasè inamorâ il fi dal imperadôr, Oton, che al decidè di maridâle e di menâle cun se in Baviere. La comunitât di Cjanive e varès acetât dome se in cambi Oton al ves lassât un ricuart di Teresine. Cussì il fi dal imperadôr al regalà a Cjanive une campanele, che Teresine in persone e jere lade di persone a cjoli a Cèneda. Il dì prin di partî ju saludarin cun grandis fiestis. Cussì vuê come dal 1339 la storie e torne a fâsi e il ricuart al dure.
La zornade e je organizade par memoreâ in ogni moment chel dì: lis buteghis che a vierzin a matine, Oton che al rive, l’intric amorôs, la cjanive che si vierç, lis fraiadis, la gnot medievâl fin a finî cu la partence dai doi inamorâts. Une manifestazion cun tantis emozions intun lûc une vore sugjestîf: di no pierdi.