Azienda Agricola Vinai dell'Abbate

La Badie, ancje se e je avonde lontane dai centris plui grues, e à dulintor une schirie di puescj par mangjâ tant che l’agriturisim “Ronchi di Sant’Egidio” che al è pôc lontan (viert dome tai fins di setemane) e il ristorant “Al Buco” a Dolegnan. Altris ristorants si ju cjate a Cormons (“la Subida”) o a Sant Zuan dal Nadison (“al Campiello”). Il paîs plui dongje là che a son ambients publics al è Cuar di Rosacis. Se invezit si vûl fermâsi la gnot si pues lâ a Manzan, a Sant Zuan o a Cormons.

La localitât no je servide di traspuarts publics.

Bielzà dai timps plui antîcs, la Badie di Rosacis e à fat vins di cualitât cetant alte e ancje par chest e à podût incressi la sô innomine. Tal 1978 te badie al è rivât Walter Filipputti e tal 1980 al à vût in concession de Arcidiocesi di Udin i vignâi, bandonâts di un biel pôc di timp, che po al à restaurât valorizant lis uis autoctonis tant che il Pignûl, la Ribuele Zale e il Picolit, tesaurs vêrs de enologjie furlane.

I vignâi a son dentri inte sot zone di Rosacis che e fâs part de aree d.o.c. dai cuei orientâi dal Friûl. E je une zone une vore buine par diviers aspiets: pal microclime clip leât al jessi avonde dongje dal mâr, che al è a sù par jù a 30 chilometris; pe altece (m 176 snm), che, in plui de ventilazion, e ufrìs lûs plui fuarte e plui batude di soreli; e po par vie che la mont di Sante Catarine (m 237 snm) e pare de tramontane. Ducj chescj elements adun a formin un microclime che al permet di fâ vins di gruesse impuartance, sei blancs che neris. La Aziende e à dôs cjanivis: chê là che si fâs il vin, che e bute sul curtîl de glesie, e chê là che si invecje il vin, che e je la cjanive origjinâl de badie, doprade par secui dai fraris e che e je la plui antighe de regjon. Cun di plui, si segnale la buteghe “Vino e Cose”, sul plaçâl de glesie, là che, dongje dai vins e dai vuelis che si fasin in badie, si pues comprâ prodots dal artesanât locâl o alimentârs che a contribuissin a formâ la culture de taule.