Tarcint

Il paîs al à vût doi cjistiei: chel disore, denominât ancje di Sant Lurinç, e chel disot, di Cuie: dal ultin a esistin ancjemò i rescj di une torate. Al è probabil che chel disore al sedi il svilup di une tor di avistament romane, doprade forsit ancje dai langobarts. Il loco de Tercento si lu cjate citât pe prime volte intun document dal 1126, feut, almancul par une part dai siôrs di Machland, che po lu regalarin al vescul di Salisburc; e di Leon, fi di Erzo di Grimonis de Tercento, ministeriâl di cheste curie, il feut al passà ai siôrs di Cjaurià. Muarts cence fîs Fidrì e Detalm, tal 1281 il feut al fo assegnât a Artic dai siôrs di Cjistiel, famee che po e cjapà sù il non di Frangipane e che e fo la parone tai secui dopo. Il cjistiel disore al fo butât jù in vie definitive tal secul XIV, concentrant lis atenzions su chel disot, slargjât e miorât tes difesis.  Ancje chest, dut câs, al fo bandonât daspò dai dams patîts pai disordins e il taramot dal 1511.