Giardino di Rocca Bernarda

La Roche Bernarde, ancje se si mostre ai voi dai visitadôrs come une fuartece difensive, in realtât e nas "per ornamento di que nostri colli, et per diletto et per commodo mio et de gli amici [...]", come che al spieghe il nobil Jacop di Voleson Manià intune letare al Consei de Magnifiche Comunitât di Cividât, cidinant cussì i timôrs che la costruzion e podès vê carateristichis ofensivis. I fradis Voleson Manià (Jacop, juste apont, e Bernart) le destinarin, duncje, propit a altris funzions: puest par incuintris cui amîs, par cjacis e par legris cunvignis leterariis, a conferme dal impegn culturâl che a àn vût te vite dal Friûl dal Cinccent. Lis unichis notiziis che nus son rivadis sul splaç vert convicin a rivuardin i vignâi che a àn vût la cure e la atenzion de famee cun otims risultâts: i vins, tant che il picolit o la ribuele, donâts in plui ocasions ai lutignints venits o a Carli V imperadôr a son stâts celebrâts parfin di poetis. Cun facilitât e je cirche dal stes periodi la struture formâl dal piçul zardin che al orne il curtîl interni de Roche, vuê cuasi dal dut sparît (al vignarà cun probabilitât ripristinât intune cu la ristruturazion dal edifici che e je za in vore), cussì come il grant ciprès a vuardie de jentrade dal edifici, che, pai siei 400 e plui agns, al è stât declarât monument storic. A son plui resints i arbussits, metûts intal passaç in mût casuâl, che a ornin lis rivis dal cuel ; si viodin cedris bicentenaris dal Liban ulîfs, cjarpins, pinessis che a fasin di sfont a statuis dal Sietcent metudis cence un scheme precîs.