Giardino di Fontanabona

Tal cjistiel di Fontanebuine si rive par mieç di un viâl e di une stradele cuvierts di grave che a van sù pal cuel, contornâts di cisis e di tancj arbui di fust alt plantâts in maniere che e somee casuâl. Sul imprin de strade si viôt l’arbul plui rimirât pes sôs dimensions e pe carateristiche forme di gloriet cun lidrîs esternis grandis e articoladis: e je la rare e secolâr tuie, plantade devant dal grant fabricât de aziende agricule. Un grant rôl, diviers cjastinârs, platins, pins e peçs si alternin a altris speciis intervaladis ca e là di cualchi statue sietcentescje. Ancje la plane a nord e je stade plantade a parc, cun zonis a prât e arbui di fust alt.
Rivâts insom dal cuel si passe ae vile par mieç di une piergule di glicinis che e mene intun zardin soredut di prât; un vialut centrâl al puarte li de jentrade, biel che altris doi plui piçui si slontanin: un al mene viers il cuarp setentrionâl de costruzion dulà che si pues notâ ancje une cistierne antighe dibot insuazade di dôs lagerstroemiis, chel altri viers la capele avodade ai sants Filip e Jacum, dulà che ogni an si fâs une sugjestive celebrazion eucaristiche che ducj a puedin partecipâi (I di Mai).
Ator dal prât, sierât di cualchi arbossit, si amirin parmìs de capele un grant ciprès, un grup di çamars e une grande araucarie. Une grande magnolie e spiche isolade dulà che e jere la tor antighe, sdrumade tal Votcent.