Galleria dei disegni e delle stampe

Cheste sezion e à plui di tremil tocs, che a van des xilografiis dal finî dal Cuatricent fin aes litografiis dal Votcent. A vegnin pal plui des donazions dal abât Giovanni Battista del Negro, dal cont Francesco di Toppo e di cetancj altris colezioniscj. Inte esposizion grande atenzion e je stade dedicade ae cartografie e ae vedutistiche, in particolâr a chê furlane e a chê de citât di Udin che si cjatin sul tacâ e sul finî dal percors.

Jenfri dut il materiâl e risalte une viodude prospetiche dal 1661 Udin Metropoli dal Friûl di Ruffoni-Gazoldi-Cosattini, stampade in seconde edizion intal 1740: culì al è custodît, conservât une vore ben, il ram incidût. Cetant grande (m. 2x0,45) e mostre cjasis, palaçs, glesiis, stradis e placis de citât cun precision e atenzion no dome pal fat artistic ma ancje pe realtât urbanistiche.

Cun di plui si pues amirâ une sezion cun disens di artiscj venits che dispès si cjatarin a Udin e in Friûl dal XVI al XIX secul (ancje Palma il Giovane e Sebastiano Ricci), ancje se il secul che al ven miôr rapresentât al è il Sietcent cun tocs bielonons di Giulio Quaglio, dai venezians Giambattista e Giandomenico Tiepolo, Francesco Fontebasso, Gaspare Diziani e dal furlan Francesco Chiarottini. A vegnin daûr une schirie di stampis di grant valôr sei pe lôr raritât che pal fat che a son stadis realizadis di grandis personalitâts artistichis (di Luca di Leyda a Albrecht Dürer, dai Carracci a Antonio Tempesta, di Jacques Callot a Rembrandt).