Galleria d'arte antica

La Galarie e nassè intal 1866 cuntun biel grup di oparis racueltis intes glesiis, intes cjasis, intai palaçs de regjon tant che testemoneance de produzion artistiche locâl; intal timp donazions, dipuesits e acuisizions a àn insiorât la colezion che e conte ancje pituris di nivel nazionâl e internazionâl. Logade intal plan nobil dal cjistiel, la esposizion e ocupe 13 salis dulà che lis oparis a son metudis fûr daûr di un ordin cronologjic, dal secul XV al XIX; si pues cussì amirâ, jenfri lis pituris, la Crocifission dal Bellunello, il Crist e i imprescj de Passion di Vittore Carpaccio, la Ultime Cene di Pomponio Amalteo, la biele piture di Palma il Giovane, Sant Marc al met Udin sot de protezion di Vignesie dal 1595, i autoritrats di Sebastiano Bombelli, l’Agnul custodi di Gianbattista Tiepolo; si pues sierâ l’itinerari cun artiscj sicu Francesco Chiarottini e Odorico Politi.

A mieç percors si vierç il grant “Salon dal Parlament” (m. 26x13) dulà che une volte ad an – ai 12 di Lui, cuant che e cole la fieste dai sants Ermacure e Fortunât – si dave dongje il Parlament de Patrie dal Friûl. Culì Pomponio Amalteo al dimostrà di vê capît ben i principis tridentins de funzion educative da la art. Di fat, cun tal cjâf i valôrs morâi sei laics che religjôs e il lealisim politic, al metè adun su lis parêts, intune cun Gian Battista Grassi, un implant iconografic pensât dal lutignint venit Filippo Bragadin. I artiscj che daspò a àn lavorât intal salon no àn çoncjât il progjet origjinâl: di marcâ i Secanti intal Sîscent e Gianbattista Tiepolo intal Sietcent. Tiepolo cuant che al à tornât a cjapâ sù i sogjets antîcs al à cambiât i costums e la impostazion des figuris, dulà che si pues ancjemò viodi il trat lassât su la stabilidure, li che si poie il carton pe preparazion dal afresc. Viers il sofit (une volte plui alt) si puedin viodi i stemis dai lutignints venits dal 1420 al 1797. Cualchi volte lis salis a vegnin dopradis par esposizions temporaniis.