Civico Museo del Castello di San Giusto

Logât dentri de Cjase dal Cjapitani, il museu al racuei une schirie di armis sei blancjis che di fûc: tal plan tiere canons dal XVI-XVII secul tornâts a fâ sù intes parts plui ruvinadis; dilunc de scjalinade cun doi rams che e rive al prin plan, lis parêts a son decoradis cun cetantis armis di aste dai secui XVI e XVII; tal secont plan, intes cjaminadis di ronde, si cjate la part principâl de colezion che e ven di donazions privadis des fameis Caprin e Sartorio. Logade culì intai agns Trente, la esposizion e mostre la evoluzion des armis sei italianis sei europeanis dal XII al XIX secul: armaduris, spadis, pugnâi, florets, pistolis, a son stadis alternadis cun sapience a mobilie e a sculturis che a vegnin di lûcs e timps diferents. E je di fat maraveose la casse di nuvice di len intaiât dal Cuatricent.

Par creâ inta cjistiel une sale di rapresentance a forin acuistâts i mobii che Giuseppe Caprin (1843-1904) al doprà par furnî la sô “Sale Venite”, lûc dulà che si cjatavin i inteletuâi de seconde metât dal secul XIX. Tal prin plan dal edifici si puedin cussì preseâ, no dome il maestôs aredament, ma ancje pituris dai secui XVI-XVIII e, sul sofit, une grande piture di Andrea Celesti (1637-1712) che e rapresente il Trionf di Vignesie. Insom si segnale al plan tiere une piçule capele cun esemplis di sculture di len (vadì dal secul XVI) e pituris che a decorin l’ambient, ma ancje il tradizionâl simbul de citât, il Melon, nassût tant che element decoratîf sculpît a volum taront e metût su la piche dal cjampanîl de catedrâl (1343).