Museo di Miramare

Il percors dal museu si davuelç intai apartaments de cubie arciducâl che a son restâts, inte plui part dai spazis, come che a jerin. In particolâr lis “Salis di Massimilian” a son une vore preziosis e fra chestis e je di ricuardâ la “Sale Novara” dal non de nâf dulà che al scomençà la cariere di uficiâl di marine e che e mostre une riproduzion dal cuadrât di pope. Su la decorazion in len de parêt  si puedin viodi in alternance la ancure cu la corone, simbul dal so contramiraliât inte Marine austriache, e l’ananas simbul de prosperitât e de ricjece. Chescj motîfs, che si cjatin ancje intai rivestiments celescj des parêts, si cjatin in mût cuasi ossessîf in dut il plan tiere. I furniments dal Votcent, pe plui part in stîl flamant, a son insiorâts di altris ogjets di fabricazion orientâl che a mostrin la passion di Massimilian pal esotic.  Dongje des trê stanziis destinadis al imperadôr si cjatin lis cuatri riservadis a Carlote (cui stemis che a ricuardin lis origjinis di dutis dôs lis fameis, i Asburc e i Sassonie Coburc Gotha) e fra chestis la cjamare par durmî e chê par disvistîsi; il furniment in stîl lombart che lis caraterize al jere stât donât de citât di Milan in ocasion dal matrimoni di Massimilian e Carlote tant che segnâl di agrât pal ritrat di Carlote in costum de Brianze.  Ae comoditât  e ae intimitât dal plan tiere al fâs cuintri il fuart savôr di uficialitât dal plan superiôr plen di sflandôr e di ostentazion.  Lis primis salis, in origjin destinadis a Massimilian, a son stadis ristruturadis par dâi acet dal 1930 al 1937 ae famee dal Duche Amedeo di Aoste e a àn ancjemò in dì di vuê un furniment in pûr stîl razionalist. Rivâts a un puiûl si continue la visite ai apartaments di Massimilian; pes parêts l’imperadôr al veve sielzût une stofe di colôr ros par meti in evidence i intais a fueis di aur alternâts cun len e lidrîs. Achì, dongje de riproposizion dal ananas, al veve fat meti tant che motîf iconografic une acuile cuntun sarpint tignût intal bec, cun parsore une corone e il monogram formât di une dople M (Massimilian Messic) cuntun “I” intal centri (par significâ prin o imperadôr). Fra lis salis dal plan, chê des “Udiencis” e je une des plui rapresentativis dal cjistiel. E je metude intune posizion favoride, tal mieç de façade viers dal mâr; tes parêts a son telis che a mostrin cualchidun dai protagoniscj de vite di Massimilian – fra chestis ancje un ritrat di Sissi (E. Türck) – e esemplis di taulins a mosaic di manifature vaticane. La visite al cjistiel e finìs cu la “Sale dai cocâi” dulà che l’imperadôr al à volût mostrâ la sô passion pal mâr fasint piturâ il sofit cun trentesîs cocâi che a svolin e che a tegnin fassis cun sprocs latins.