Museo della moda e delle arti applicate

Il museu si cjate in Borc Cjistiel, dentri di cjase Dornberg, origjinarie dal Cinccent, e al è nassût des preziosis colezions di tiessûts e di arts aplicadis che i Museus Provinciâi di Gurize a àn metût dongje e incressût intal timp cun donazions e compris. Il museu al scomence cuntune piçule pinacoteche dulà che i ritrats a furnissin une documentazion dal mût di vistîsi de societât borghese e aristocratiche di une volte, dai zoiei, che si puedin cjatâ in origjinâl in vitrinis li dongje, e dai aurs votîfs de glesie di Sant Ignazi. L’arc di timp considerât al è chel che al va dal Sietcent al Nûfcent, ma il periodi plui rapresentât al è chel fra il 1890 e la prime vuere mondiâl. La visite a va indevant fra ambients che a rivuardin lis ativitâts artesanâls che a àn a ce viodi cu la produzion dai vistîts (il cjaliâr, il cjapelâr par esempli) cui lôr struments di vore, in alternance cun sezions dedicadis a veri, ceramiche, fier batût che nus fasin capî ancje il svilup di chês altris arts decorativis. Fra i furniments plui preziôs o vin il picet, che intal gurizan al à une tradizion che e va indaûr fin al 1672. A son stadis dôs Maris Ursulinis che a vignivin di Liege a puartâ a Gurize la art dal picet a fusel dulà che la influence flamande si misclice dome in part cun sugjestions che a vegnin de Europe orientâl. O vin daspò une esposizion cun manichins dulà che si puedin viodi lis variis tipologjiis di vistîts che a vignivin puartâts vie pe zornade e in ocasions particolârs. Inte societât medie e alte di fat si veve di cambiâ dispès i vistîts e i acessoris daûr des variis ocasions (in particolâr i guants e lis borsetis dal Sietcent al 1925). I vistîts, di gust mitteleuropean, a jerin sedi impuartâts des capitâls de mode, Parîs e Viene, sedi cun divignince di  negozis e ateliers locâi. Par cheste reson, intune sale destinade a ospitâ varis events, al è stât ricostruît il lûc primari de elegance feminine: la sartorie. Si passe in fin aes salis destinadis in mût prevalent ae produzion. La lavorazion de sede e je stade une des ativitâts di grant rûl economic intes conteis di Gurize e Gradiscje sore dut intal Sietcent. La machine che si pues cjatâ in esposizion e je dal secul XVIII. Al è un filatoi circolâr, unic tal so gjenar, che al funzione ancjemò dal dut. Dal stes periodi a son i campions di tiessûts di produzion locâl: taffetas, gros de Tours, piçui operâts, damascs.