Festa della zucca

La Fieste de Coce e je une manifestazion dibot uniche pe sô maniere un tic gaiarine di interpretâ lis antighis cronachis de tiere di Vençon.
Ve alore saltâ fûr tant che par incjant, tal centri storic de citadine medievâl, jessûts di une flabe o, se si à miôr, di un libri di storie, musics, gaugars, mangjefûc, nobildonis e cavalîrs, personaçs tant che il duche de Coce e i membris de Sacre Arci Confraternite de Coce, i teribii soldâts, l’impostôr e il cercandul, il campagnûl cu la plume e tancj altris. Ma al centri di dut e je sô maestât la coce. Cocis dapardut: in place, tes vitrinis, tes locandis e ostariis, tai barachins, cocis cuinçadis in ogni salse, buinis di sodisfâ lis esigjencis ancje dai plui curiôs e esigjents, cocis di ogni forme e dimension, po dopo fintremai misuradis cun chel improvisât argagn che al è il coçometri. No baste: e je ancje la mostre concors de preziose (e spes dismenteade) ortaie: cocis intaiadis o decoradis in mil manieris, tant di deventâ piçulis oparis di art. Un premi particolâr al va ae plui pesante: si son vudis cocis ancje di 251 kg!
E chest fint sot sere di une zornade medievâl che no cjate il compagn: la gnot che e rive e  e puarte inmò une ponte di antîc incei ae manifestazion, sclaride des torcis che a menin indaûr tai secui, ai timps dal Patriarcje Bertrant, de sflandorose Ete di Mieç di Vençon e di tancj personaçs soterâts sot pagjinis di storie che cheste manifestazion e à contribuît a fâju tornâ a scuvierzi e preseâ.

Ae Fieste si lee la leiende de Coce di aur.
Si conte che la nobilissime comunitât di Vençon, dopo vei furnît il paîs di supierbis difesis, di vêlu ornât di preziôs palaçs e dal so maestôs Domo, cuant che e volè finî il tor no veve i bêçs che i coventavin. I dazis des marcjanziis a forin dopleâts, ducj i forescj che a passavin par Vençon a vevin di lassâi une ufierte, si vevin di fâ zornadis di vore no paiade.
E cussì, si ben jenfri cualchi sustament, si rivà a finî ancje la spice, po fodrade dute di ram. E mancjave inmò alc e par chest al fo clamât un mestri di Udin che al coronà la biele opare cuntune bale indorade sormontade di une crôs. Ma l’artist al restà di clap cuant che si presentà par ricevi la ricompense pal so lavôr: il Consei i disè che al jere a curt di bêçs e che ancje lui al veve di lassâ jù cualchi zornade di vore no paiade, e che il Consei, pe sô bontât, i concedeve nome un tierç de sume stabilide. Nol disè nuie il cristian, si mostrà sodisfat e al ringracià.
A dute gnot, però, al montà su la armadure dal tor e al sostituì la biele bale lusinte cuntune coce frescje, cussì ben piturade che nissun si sarès inacuart de sostituzion. La dì dopo l’udinês al gjavà la armadure, al saludà il Consei e al partì, biel che i vençonàs sunant lis lôr cjampanis si preparavin pes grandis fiestis de inaugurazion.
Ma dopo un tic di timp al sucedè alc di strani: la sù, sore la spice dal tor, la bale e gambiave di colôr, la forme no jere plui chê; i vençonàs no savevin plui ce pensâ, ma ce maravee cuant che une dì a vioderin colâ jù la bale in cierts tocs zâi che a someavin i vanzums di une fuiace disfate. Si inacuarzerin inalore di jessi stâts propi menâts ator. I cjamerârs dal Domo a derin daurman l’ordin che i vanzums a fossin gjavâts e che il scandul no si slargjàs.
Ma il câs al volè che propi in chê dì al passàs cualchi Cjargnel, che ben vulintîr al sparniçà la burlade, e e fo cussì che fint in dì di vuê  i vençonàs a son clamâts cogoçârs.