Palio donna

La sere prime dal Pali, che si davuelç la seconde domenie di Setembar, in ogni borc citadin che al partecipe ae gare si organizin cenis propiziatoriis medievâls cu lis citâts di art, lis delegazions forestis e divertiments musicâi, dulà che par partecipâi al tocje notâsi. Udin al ufrìs une vore di alternativis ancje par chei che a vuelin svicinâsi ae cusine dal puest e no nome, magari lontan de fieste: Ai frati, Alle volte, Vitello d’oro, L’osteria dei beneandanti, La Maddalena, a son nome cualchidun dai tancj locâi che o podês sielzi.
Il Paliodonna, che si fâs ogni an te seconde setemane di Setembar, al à la sô origjin tal 1375, cuant che la int di borc di Graçan e otignì des autoritâts comunâls il permès par contindi un pali te sô borgade, un pali risiervât nome aes feminis. La manifestazion e manten, inmò vuê, cheste ultime carateristiche. Par cuatri zornadis seguitivis, di joibe a domenie, lis fantinis - che a van a cjaval cence siele – a àn di superâ cinc provis uficiâls par rivâ a contindi il pali vêr e propi la domenie dopomisdì. La finalissime e je contindude des vincidoris dai grups dai borcs e des citâts di art e des delegazions forestis. I premis, un pe corse jenfri i borcs, chel altri pe finâl, a son doi cuadris di doi pitôrs famôs che a rapresentin il cjaval e la femine: i Palis, juste apont.
Une vore sugjestive e di no pierdi e je la sfilade in costum che si fâs la sabide dopomisdì cun dutis lis Rapresentancis che a partecipin ae gare.