Agosto medioevale

Intant dal mês di Avost la citadine di Glemone e fâs di sene a une schirie di manifestazions storichis. Il moment plui impuartant dal program a son lis seradis di ambientazion medievâl Tempus est jocundum, che a animin il centri storic intant dal prin fin di setemane.
L’orloi dal timp al torne indaûr e intun moment si cjatisi intun borc dal Tresinte. Musichis antighis e pas di bai popolârs a invidin a scuvierzi il passât, compagnâts di bufons e contestoriis. Lis andronis si jemplin di marcjadants e artesans, i cjantons des stradis a platin tes lôr ombris lis feminis che a lein il futûr e tes corts i alchimiscj a sperimentin gnovis catramonacjis, mostrantjus la lôr art. Pes stradis o cjatarês marcjadants, pelegrins e personis straniis, ma atenzion a no ufindi lis cortesanis e i cavalîrs, parcè che oms armâts a àn la consegne di puartâ i manigolts ae berline!
Il scjas dai cjars, i moviments dai trampolîrs, i mangjadôrs di fûc, il corteu storic e il spetacul dai sbandieradôrs a compagnaran i visitadôrs intant des seradis de manifestazion.
Vie pal secont fin de setemane si fâs la Gjostre di istât tra i Borcs, cul Pali dal Niederlech. Cheste sfide emozionante e cjape la idee dal vieri privileç di fâ paiâ il dazi aes marcjanziis che a passavin, dât ae Magnifica Comunitas Terrae Glemonae dal Patriarcje tor la metât dal sec. XIII. Dopo provis faturosis i doi borcs vincidôrs a podaran sfidâsi ai 14 di Avost intune gare  a Dame su maxiscachiere, tra i Blancs e i Neris, par proclamâ la Siore dal Cjistiel, che par un an e sarà la Siore de citât.