Azienda del Sovrano Militare Ordine di Malta
La Roche Bernarde si le cjate tune posizion avonde par so cont framieç des clevis che a son a Sud di Cividât. Il paîs plui dongje al è Iplis, là che si cjate cualchi ostarie, invezit se si vûl svicinâsi al mangjâ tipic de zone si consein la tratorie “al Buco” a Dolegnan e la ostarie “all’Armistizio” che e je in localitât Quattro Venti; altris ristorants si ju cjate a Cividât, compagn dai albiercs.
I vignâi in culine de aziende agricule “Rocca Bernarda” a àn une vocazion antighe ae produzion di vins di cualitât alte. Su lis muris de Roche, suntune lapide al è scrit: “Vineis avitis rest. et auctis” tant a dî che in chê volte lis vîts a jerin za. Ancje vuê i tecnics de Roche Bernarde a frontin i problemis de tecnologjie moderne tignint simpri a ments la tradizion storiche de aziende.
I vignâi in produzion a ocupin sù par jù cuarante etars e buine part des vîts e à plui di vincj agns. A son coltivadis undis varietâts e il Picolit, la ue simbul de aziende, al ocupe plui etars. Coltadis e trataments si limitin a ce che al covente, di maniere di conservâ plui che si pues l’ecuilibri vegjetatîf; dute la atenzion metude pai vignâi si le met ancje pe vendeme, che e ven fate a man, e po par fâ il vin. In cjanive, di fat, daspò de foladure lizere des uis, si à miôr doprâ i sistemis fisics impen di chei chimics. Par solit si doprin vassiei di açâr inossidabil, che a permetin di controlâ la temperadure de bulidure, che e je di fonde par conservâ tal vin i profums de ue. Cierts vins selezionâts a son ancje metûts in botis di rôl.Azienda del Sovrano Militare Ordine di Malta
Via Rocca Bernarda, 2733040 Ipplis Premariacco (UD)
Telefono: 0432 716914 Fax: 0432 716273
E-mail: info@roccabernarda.com; paolo.dolce@roccabernarda.com